Առողջության Առաջնային Պահպանման Բարեփոխումների Ծրագիրն Ամերիկայի Միացյալ Նահանգների միջազգային զարգացման գործակալության (ԱՄՆ ՄԶԳ) կողմից ֆինանսավորվող հնգամյա (2005-2010) ծրագիր է, որն իրականացվում է 2005թ.-ի սեպտեմբերին Էմերջինգ Մարքեթս Գրուփ, Լտդ. (ԷՄԳ) ընկերությանը շնորհված պայմանագրի շրջանակներում: Ծրագրի հիմնական նպատակն է բարելավել առողջության առաջնային պահպանման (ԱԱՊ) ծառայությունների որակը Հայաստանում եւ բարձրացնել բնակչության կողմից դրանց օգտագործման մակարդակը:
Ծրագիրն իրականացվում է Երեւանում եւ մարզերում, մարզերի ներգրավման ծրագրին համապատասխան:
ԱԱՊԲ Ծրագրի բոլոր աշխատանքները խմբավորված են վեց բաղադրիչներում`
| Բարեփոխումների ընդլայնում. բարեփոխումների իրականացման համար բարենպաստ կարգավորիչ միջավայրի ստեղծմանն աջակցում, ողջ հանրապետության տարածքով ԱԱՊ հաստատությունների վերանորոգում եւ սարքավորումներով հագեցում, հաստատությունների ղեկավարության համար դասընթացների անցկացում: |
| Ընտանեկան բժշկություն. շարունակական բժշկական կրթության համար ժամանակակից կրթակարգի եւ կրթական նյութերի մշակում, ընտանեկան բժշկության անկախ խմբային պրակտիկաների ստեղծում, ընտանեկան բժիշկների եւ ընտանեկան բուժքույրերի համար ուսումնական դասընթացների անցկացում: |
| Բնակչության գրանցում. Հայաստանի առողջապահության ոլորտում բնակչության գրանցման սկզբունքների ներդրում` բուժծառայություններ մատուցողների միջեւ մրցակցության խթանման եւ դեպի հիվանդը կողմնորոշում ունեցող ծառայությունների տարածման միջոցով: |
| Բուժօգնության որակ. բուժօգնության որակի բարելավում` որակի ժամանակակից ստանդարտների եւ որակի ապահովման ընթացակարգերի ներդրման միջոցով, ինչպես նաեւ բուժծառայություններ մատուցողների լիցենզավորման եւ հավաստագրման կանոնակարգերի ներդրում: |
| Առողջապահության ֆինանսավորում. առողջապահության ֆինանսական միջոցների բաշխման գործընթացի թափանցիկության եւ արդյունավետության բարձրացում` ծառայությունների ծախսերի սահմանման եւ ըստ կատարողականի պայմանագրերի կնքման պրակտիկայի ներդրման միջոցով, հաստատությունների մակարդակով հաշվետվական գործընթացի բարելավում, Առողջապահության ազգային հաշիվների օգտագործման սահմանում: |
| Հանրային կրթություն. ԱԱՊ ծառայությունների վերաբերյալ հանրության իրազեկվածության մակարդակի բարձրացում, բնակչության գրանցման գործընթացի եւ ընտանեկան բժշկության ծառայությունների մասին տեղեկատվության տարածում, առողջ ապրելակերպի եւ առողջ լինելու ձգտման վարքագծի խթանում: |
Ծրագրի գործունեության արդյունքում կվերանորոգվեն եւ սարքավորումներով կհագեցվեն 100 բուժակ-մանկաբարձական կետեր եւ մոտ 130 ամբուլատորիաներ եւ պոլիկլինիկաներ, կվերապատրաստվեն 150 ընտանեկան բժիշկներ եւ 670 ընտանեկան բուժքույրեր, հանրապետության մասշտաբով կստեղծվեն մոտ 80 ընտանեկան բժշկության նոր խմբային պրակտիկաներ:
Ծրագրի հաջող իրականացումը մեծապես պայմանավորված է Առողջապահության նախարարության, Պետական Առողջապահության Գործակալության, բժշկական ուսումնական հաստատությունների եւ բժշկական ասոցիացիաների, ԱԱՊ ծառայություններ մատուցողների, կլինիկական դասավանդողների եւ ընտանեկան բժիշկների աջակցությամբ:
Մարզերում ԱԱՊԲ Ծրագրի իրականացման պլան
Շարժվելով մարզից մարզ` Ծրագիրը գործունեություն է ծավալելու ամբողջ հանրապետությունով մեկ: Այժմ սկսված են աշխատանքներն առաջին գոտում, որը ներառում է Լոռու եւ Շիրակի մարզերն ու Երեւանը, ընդ որում մայրաքաղաքում դրանք իրականացվելու են ընդհուպ մինչեւ 2010 թվականը: